Mensur Krasniqi
Gjatë ditë së djeshme, Kosova edhe zyrtarisht ka një president të ri. Hashim Thaçi ka marrë detyrën e kreut të shtetit, në një ceremoni tepër solemne ku kanë qenë prezentë përfaqësues të rëndësishëm politikë si nga Kosova, Shqipëria, Maqedonia dhe 50 vende të ndryshme nga e gjithë bota.
Por si i tillë, Thaçi nuk pranohet si president nga opozita. Sipas saj, një president që vendoset në post me votat e partive qeverisëse, nuk mund të jetë president i gjithë kosovarëve, dhe me këtë veçse po i bëhet dëm Kosovës. Kritikët thonë se Thaçi ka insistuar që të bëhet president me shpresën se gjykata eventuale, ajo Speciale, do ta lërë të qetë nga akuzat e mundshme për krime lufte.
Dhe si e shohin Thaçin president nga një hapësirë tjetër shqiptarie veç Kosovës, në Maqedoni?
Xhenis Sulimani, analist politik dhe aktivist civil, thotë se përfaqësues si Thaqi nuk i nevojiten kosovarëve dhe popullit shqiptar në përgjithësi.
“Insistimi i Hashim Thaçit që të bëhet president dhe arritja e qëllimit, është një pasqyrë reale e politikanit të sotëm shqiptar. Tip politikani që mendon se politika sillet vetëm brenda institucioneve dhe se kontributi mund të jepet vetëm kur je në krye të proceseve politike, duke mos llogaritur rezultatet finale. Pra, mjafton pjesëmarrja. Thaçi pas luftës ka dështuar pothuajse në të gjithë politikat e tija. Ka ngecur në procesin e njohjes së Kosovës, ka ngecur në liberalizimin e vizave, në forcimin e demokracisë dhe zhvillimit të Kosovës. Thaçi ishte kryeministër kur u shqiptarët e Kosovës në masë të madhe u nisën rrugëve ilegale drejt Europës për ta siguruar ekzistencën”.
I karakterizuar me dështime të njëpasnjëshme dhe i dhënë aq shumë pas pushtetit, është tregues i mirë se te ky person interesi personal është mbi atë të përgjithshëm. Kësi përfaqësuesi politik nuk i duhet popullit të Kosovës, por as shqiptarëve në përgjithësi. Kujtojmë ishte po ky politikan, atëherë si kryeministër, kur në momentin kur po rriheshin të rinjtë shqiptarë në Maqedoni, ky u zotua se është gardian i çështjes shqiptare. Por vetëm gojarisht, praktikisht gardiani nuk u pa.
Muhamed Jashari, thotë se presidenti duhet të ishte një njeri unifikues dhe i pranueshëm për të gjithë
“Kosova si një shtet i ri që është dhe që ka nevojë të njihet në arenën ndërkombëtare, kujtoj se do të duhej të kishte një president unifikues dhe i pranueshëm për të gjithë. Mirëpo kjo nuk nënkupton se zgjedhja e Thaçit si president është kontestuese. Kjo ngase ai morri votat e nevojshme për këtë post. Roli i tij tanimë është ceremonial dhe kësisoj ai edhe në aspektin kushtetues nuk do të jetë ashtu siç ishte më parë. Konsideroj se opozita nuk duhet të harxhon energji në lidhje me atë se vallë është apo nuk është legjitim presidenti aktual”. /tesheshi.com/
