Sipas një hulumtimi të bërë nga Instituti Demokratik i Kosovës (KDI), për zgjedhjen e Presidentit nga populli, del të jetë kryetari i PDK-së Hashim Thaçi si personi më i preferuar nga qytetarët e anketuar për postin e Presidentit me 29.6 për qind.
Ndërsa si kandidatin e dytë më të preferuar qytetarët kanë nxjerrë ish kryetarin e Lëvizjes Vetëvendosje, Albin Kurti me 17.1 për qind, kurse kryetari i AAK-së, Ramush Haradinaj është personi i tretë më i preferuar nga qytetarët me 10.6 për qind.
Një pjesë e konsiderueshme prej 9.8 për qind e të anketuarve janë përgjigjur se nuk kanë ndonjë kandidat të preferuar, përderisa 6.9 për qind kanë thënë se do të dëshironin dikë tjetër jashtë skenës aktuale.
Presidentja e tanishme e vendit Atifete Jahjaga duket se nuk gëzon mbështetje të qytetarëve edhe për mandatin e dytë, duke qenë se vetëm 2 për qind e të anketuarve janë përgjigjur se do të dëshironin një gjë të tillë.
Sipas rezultateve të anketës, nuk ka një person konsensual që do të merrte shumicën e votave të qytetarëve, që nënkupton se në rast të zgjedhjeve të drejtpërdrejta duhet të mbahej raundi i dytë i zgjedhjeve në mes të dy kandidatëve më të votuar./tesheshi.com/
