Zv.kryeministri i Kosovës, njëherësh edhe shefi i diplomacisë, HashimThaçi, nuk ka ngurruar ta komentojë Raportin e Progresit për vitin 2015, duke u shprehur se ky raport thekson progresin më të madh të shënuar ndonjëherë në procesin e integrimit europian. Thaçi ka shkruar mes të tjerash në faqen e tij në rrjetin elektronik facebook se tashmë me të drejtë presim dhe liberalizimin e vizave për vitin e ardhshëm, meqë, sipas tij, Raporti i Progresit e ka çmuar si progres procesin për liberalizimin e vizave.
Kështu shkruan zëvendëskryeministri kosovar në facebook: “Raporti i Progresit është gjithmonë i mirëseardhur si udhërrëfyes për integrimin në Europë. E mirëpres edhe Raportin e Progresit për vitin 2015, që thekson progresin më të madh të shënuar deri tani në procesin e integrimit në Bashkimin Europian — nënshkrimin e Marrëveshjes së Stabilizim-Asociimit. I mirëseardhur është edhe vlerësimi për progresin e arritur në procesin e liberalizimit të vizave. Tash me të drejtë presim që vitin e ardhshëm të udhëtojmë pa viza në Europë. Por e vërejta edhe dënimin që i bëhet dhunës së ushtruar nga opozita dhe gjykimin se kjo qasje është në kundërshtim me frymën europiane. Nuk ka dyshim që jemi në rrugë të drejtë. Të arriturat tona po marrin mirënjohje. Tani duhet edhe më tepër punë dhe angazhim. Rrugën tonë drejt BE-së më nuk mund ta ndalë asgjë dhe askush.” /tesheshi.com/
