Zv/kryeministri dhe njëherësh shef i diplomacisë së Kosovës, Hashim Thaçi, po synon të bëhet President i ri i shtetit përpara 17 shkurtit, ditë kur opozita e bashkuar ka paralajmëruar një protestë të madhe e të fortë.
Siç bënë të ditur deputetë të Partisë Demokratike të Kosovës, Thaçi i ka bërë të ditur grupit parlamentar të partisë së tij që duhet të depozitohen firmat menjëherë, në mënyrë që në seancën e 10 shkurtit gjithçka të jetë gati dhe ai të marrë votat e duhura për t’u bërë kreu i ri i shtetit.
Por opozita sipas të gjitha gjasave nuk do ta lejojë një operacion të tillë dhe do të bëjë ç’është e mundur për ta penguar. Më datën 17, ditën e pavarësisë, ajo ka paralajmëruar një protestë të madhe antiqeveritare.
Një deputet i Partisë Demokratike i tha tesheshi.com se fillimi i shkurtit është afati normal që jep Kushtetuta e Kosovës për të zgjedhur presidentin e ri.
Xhavit Haliti, nënkryetari i Kuvendit të Kosovës, theksoi se kjo çështje duhet të zgjidhet përmes një axhende të rakorduar nga palët në mënyrë që deri më 6 prill, ditë kur mbaron mandati i presidentes Jahjaga, duhet të zgjidhet presidenti i ri. Por Kuvendi mundet që ta bëjë zgjedhjen 45 dy muaj përpara, në mënyrë që dita e pavarësisë të ketë një kryetar shteti me fuqi të plota.
Në Kushtetutën e Kosovës theksohet se:
“Presidenti i Republikës zgjidhet nga Kuvendi, me votim të fshehtë. Zgjedhja e Presidentit të Republikës së Kosovës duhet të bëhet jo më vonë se tridhjetë ditë para përfundimit të mandatit të Presidentit aktual. Zgjedhja e Presidentit bëhet me dy të tretat (2/3) e votave të të gjithë deputetëve të Kuvendit. Presidenti i Republikës së Kosovës fillon mandatin pasi të ketë dhënë betimin para Kuvendit të Kosovës. Teksti i betimit rregullohet me ligjin. Mandati i Presidentit është pesë vjet”.
Pra, kufizimi është se nuk duhet bërë më vonë se një muaj pasi të mbarojë mandati i Jahjagës që është 6 marsi.
Ndërkohë, burime nga PDK-ja bëjnë të ditur se Thaçi duhet ta mbyllë këtë punë edhe më përpara, që me “një gur të vrasë disa zogj”.
/tesheshi.com/
