Hashim Thaçi ka marrë detyrën e Presidentit të Republikës, në një ceremoni tepër solemne ku kanë marrë pjesë përfaqësues të rëndsishëm politikë ndërkombëtarë.
Nga Shqipëria kanë qenë prezent në ceremoni tre krerët e shtetit shqiptar: Presidenti Bujar Nishani, Kryeministri Edi Rama dhe Kreu i Kuvendit, Ilir Meta.
Ndërkaq Kroacia është përfaqësuar nga Presidentja e Republikës, Kolinda Grobar Kitaroviç. SHBA përfaqësohej nga zyrtari i lartë i DASH, Hoyt Le, ndërsa vendet kryesore të BE-së nga zyrtarë të Ministrive të Jashtme.
Presidenti i ri i Kosovës, Hashim Thaçi ka deklaruar në fjalën e tij se është president i heronjve që ëndrrën e bënë realitet, pasi heronjë janë të gjithë qytetarët e Kosovës.
“Kam emocione dhe nderë që në këtë shesh të iu drejtohem si president i Republikës se Kosovës. Ju ftoj si qytetar të lutemi dhe t’i falënderojmë të gjithë ata që dhanë jetën që ne sot të jemi të lirë. Sot jemi të bashkuar si vend dhe si popull . Me kontributin dhe sakrificën tuaj sot i tregojmë botës që kemi arritur pjekuri si shtet demokratik. Sot po fillojmë një traditë të re. Kjo ceremoni është një kapitull i ri në librin tonë të përbashkët të sukseseve dhe janë monumentet e shtetësisë që po i qëndisim bashkë. Shteti ynë nuk do të ndalet, nuk do të pauzojmë”.
Presidenti i ri Hashim Thaçi dhe ish-presidentja Atifete Jahjaga kanë ardhur nga zyra e Presidencës, të shoqëruar nga garda e Forcës së Sigurisë së Kosovës.
Me këtë rast, Thaçi ka marrë nga Jahjaga, Kushtetutën e Kosovës si simbol i punës së tij si President.
Thaçi është betuar se do të jetë gardian i Kushtetutës së vendit, duke bërë që ajo të respektohet në çdo pike. “Të jesh President i Kosovës është nder dhe përgjegjësi e madhe politike, kombëtare dhe kushtetuese”, ka vijuar Thaçi.
Duke folur për pozitën ndërkombëtare të Kosovës, Presidenti Thaçi ka thënë se Kosova do të punojë në mënyrë edhe më aktive, për t’u bërë anëtare në nismat rajonale, evropiane dhe ato botërore.
/tesheshi.com/
