Deputetja e LDK-së, Vjosa Osmani pas ndreqjes së raporteve me shefin e saj Isa Mustafa, ku është parë në krahë të tij dhe e buzëqeshur në natën e 22 tetorit ku kjo parti festoi në kryeqytet për komunat e fituara, pas akuzave të vazhdueshme që ja bënte për shkatërrim të partisë, tashmë ka nisur përplasjen me presidentin Thaçi, ndaj të cilit hodhi jo pak akuza për degradim të Presidencës.
Osmani akuzoi Thaçin se nuk po respekton Kushtetutën dhe po tregohet diskriminues duke mos respektuar të drejtat e qytetarëve.
Ajo më tej tha se presidenti gjatë fushatës për lokalet e 22 tetorit ka mbledhur vota për PDK-në.
“Institucioni i Presidentit po tregohet diskriminues me qytetarët e Kosovës. Presidenti i Kosovës nuk po e luan rolin e vet si simbol i unitetit, këtë e dëshmoi qysh nga shpërbërja e parlamentit kur mblidhte votat për mocion. Ai ndikoi drejtpërdrejtë edhe në pakicat në qytetet të caktuara duke favorizuar PDK-në dhe duke bërë fushatë në këtë parti qoftë në Prizren, Klinë, Drenas e tjerë. Ai keqpërdori këtë institucion duke premtuar gjëra që as sa ka qenë kryeministër dhe as sa është President nuk do t’i realizojë”, ka thënë Osmani në seancën plenare.
Ajo tha se Thaci po e shkel rolin e tij kushtetues dhe në lidhje me dialogun Kosovë-Serbi dhe takimet me Vuçiçin.
Osmani në fjalën e saj, tutje ka thënë se keqpërdorimi i dytë i institucionit të Presidentit po bëhet me dialogun me Serbinë, ku sipas saj Thaçi po i bën në kundërshtim me Kushtetutën dhe rezolutat e Kuvendit.
“Faza e dytë ku po keqpërdorë rolin e tij është edhe dialogu me Serbinë. Në kundërshtim me rezolutat e Kuvendit mban dhjetra takime me Vuçiçin dhe nuk u përgjigjet qytetarëve të Kosovës për marrëveshjet që potencialisht janë të dëmshme për vendin”, ka thënë Osmani. /tesheshi.com/
