Lëvizja Vetëvendosje edhe në ditë e tretë të fushatës në tubimin e mbajtur në Vushtrri ka përçuar mesazhe fitoreje, duke thënë se me ta në qeverisje do zhvillohet ekonomia, do luftohet krimi e korrupsioni si dhe ndihmohen të varfërit.
Përveç këtyre premtimeve, në një moment u bë i “gjallë” edhe heroi i kombit Hasan Prishtina, ku kandidati për deputet, Glauk Konjufca, në fjalën e tij tha se “nëse kjo është ajo Vushtrria e Hasan Prishtinës, fitorja e tyre është e sigurt”.
Kurse kandidati i Vetëvendosje-s për kryeministër, Albin Kurti, i cili poashtu foli për fitore, bëri një premtim të madh para vushtrriasve duke thënë se nëse vjen në pushtet, secila familje do të ketë kulm mbi kokë dhe secila shtëpi do të ketë një të punësuar.
“Vushtrria është ndër qytetet më të varfra dhe shumë familje janë të pastrehuara, Vushtrria prinë në Kosovë për ikjen masive të qytetarëve jashtë vendit në këto vitet e fundit. Nuk do të ikin rinia nga Vushtrria, por edhe diasporën e Vushtrrisë do ta kthejmë për të investuar në vendlindje”, ka thënë ai, ndërsa shtoi se pas 11 qershorit, qeveria e VV-së pavarësisë do t’ia bashkëngjes sovranitetin dhe do t’ia heq korrupsionin si dhe do t’ia shtojë ekonomisë prodhimin.
Ndërsa kandidatja për deputete nga Vushtrria, Aida Dërguti, para bashkëqytetarëve vendosi të flasë për heronjtë, ku ajo “heronj” i quajti ata që jetojnë në varfëri e skamje në Kosovën e pasluftës, ndërsa shtoi se vendi tashmë ka nevojë për heronj që e përcaktojnë të ardhmen e saj.
Lëvizja Vetëvendosje gjatë ditës ka mbajtur tubime edhe në Shtërpcë dhe në Istog. /tesheshi.com/
