Ambasadorja e Shqipërisë në SHBA, Floreta Faber, informon se fatmirësisht nuk ka pasur jetë të humbura në mesin e komunitetit shqiptar në Houston, por 20 familje kanë humbur gjithçka kishin, nga stuhia “Harvey”.
Ambasadorja thotë se ka kontaktuar me drejtuesit e organizatës “Arbëria Houston”, të cilët i kanë treguar se familjet në fjalë kanë humbur nga kjo fatkeqësi natyrore shtëpitë, makinat dhe të gjithë pasurinë që kanë, raporton TCH.
“Së pari, shpresoj thellësisht që të gjithë të mbeteni jashtë rrezikut për jetën”, thotë ajo, e më pas i inkurajon shqiptarët “të qëndrojnë sa më afër njër-tjetrit e të ndihmojnë me sa të munden”.
“Ne si Ambasadë, do t’iu vëmë në dispozicion gjithçka kemi mundësi”, shprehet ajo. /tesheshi.com/
