Skuqja e perimeve në vajin e ullirit ekstra të virgjër është mënyra më e shëndetshme e gatimit. Në këtë mënyrë ushqimet janë më të shëndetshme, të pasura me antioksidantë dhe ndihmojnë në parandalimin e sëmundjeve të ndryshme apo edhe tumoreve.
Ai që promovon skuqjen e perimeve në vajin e ullirit është një studim i realizuar në një universitet spanjoll. Kërkimi hedh poshtë mitin e zierjes në ujë të vluar, e këshilluar për një kohë të gjatë në dieta të ndryshme, e veçanërisht në ato për dobësim. Studiuesit e drejtuar nga Cristina Samaniego Sanchez, e Universitetit të Granadës, kanë ndjekur një seri eksperimentesh , duke krahasuar mënyrat e ndryshme të gatimit.
Kërkimi i publikuar në “Food Chemistru” dhe i përhapur në shtypin britanik tregon se patatet dhe perimet e përdorura gjatë testit kanë mbajtur më shumë përbërës të shëndetshëm pasi janë skuqur në vaj ulliri, sesa kur janë futur në ujë të ngrohtë. Në veçanti, perimet e skuqura në vaj ulliri ekstra të virgjër rrisnin kapacitetin e tyre antioksidues dhe përmbajtjen e substancave që kontrastojnë sëmundje si kanceri, diabeti apo verbëria.
Studiuesit janë mundur të zbulojnë efektin e metodave të ndryshme të gatimit, duke analizuar perime tipike të dietës mesdhetare, siç janë patatet, domatet, kungulli dhe patëllxhanet.
Rezultatet nuk kanë lënë dyshime. Sipas Samaniego Sanchez “mund të konfirmojmë se skuqja është mënyra që prodhon rritje të mëdha të fraksionit fenolik, çka do të thotë përmirësim të procesit të gatimit. Zierja mund të rekomandohet kur ushqimi konsumohet bashkë me ujin e gatimit”./tesheshi.com/
