Prokuroria Speciale e Kosovës ka ngritur aktakuzë ndaj ish-kryetarit të Komunës së Gjakovës, Pal Lekaj. Lajmin për “Betimi për Drejtësi”, e ka konfirmuar prokurori special, Faik Halili, por që nuk ka pranuar të jep më shumë detaje.
Pal Lekaj, i cili aktualisht është ministër i Infrastrukturës në qeverinë e Kosovës, akuzohet për dy vepra penale të përvetësimit në detyrë dhe keqpërdorim të detyrës zyrtare.
Prokurori Halili, ka thënë se aktakuza ndaj Lekajt tashmë është dorëzuar në Gjykatën Themelore në Gjakovë.
Lekaj, për dy mandate ka qenë kryetar i Komunës së Gjakovës, nga viti 2007 e deri në vitin 2013, kur kishte humbur garën nga Mimoza Kusari – Lila.
Pas kësaj, Lekaj u zgjodh deputet nga radhët e AAK-së dhe ushtroi edhe postin e shefit të grupit parlamentar të kësaj partie.
Kujtojmë se përveç Lekajt, nën akuzë janë edhe dy ministra tjerë të qeverisë “Haradinaj”, ai i Zhvillimit Ekonomik, Valdrin Lluka dhe i Inovacionit, Besim Beqaj. /tesheshi.com/
