Në një intervistë dhënë për RTK-në, kreu i AAK-së, Ramush Haradinaj, ka sqaruar motivet e shkuarjes së tij në tryezën e thirrur nga presidentja Jahjaga.
“Nuk guxojmë të kalojmë në vetizolim. Duhet me fitu simpati edhe nga ndërkombëtarët”, tha ai, duke mohuar se me atë akt po tradhëtonte kauzën e opozitës, së cilës i mëshoi dhe njëherë fort.
“Nuk do të lejohet mbajtja e seancës, e asnjë lloj seance. As për zgjedhje të presidentit. Nuk do të ndryshojë qasja e opozitës. Nuk ndryshon asgjë në qëndrimet e opozitës”, shtoi Haradinaj.
Ai tha se të gjitha qëndrimet e tij publike i kishte thënë edhe në takimin me presidenten dhe kryeministrin Isa Mustafa e zëvendësin e tij, Hashim Thaçi.
Pranimi i ftesës nga kreu i Aleancës për Ardhmërinë e Kosovës për të shkuar në bisedime politike tek Jahjaga, pra për t’u ulur në një tryezë me Mustafën dhe Thaçin, qenë një goditje për opozitën, në një kohë që nisi të përflitej se Haradinaj po afrohet me qeverinë. Por ky i fundit i ka mohuar kategorikisht këto zëra duke thënë se do i qëndrojë besnik koalicionit në opozitë. /tesheshi.com/
