Haradinaj, vijon ashpërsia e gjuhës ndaj Mogherinit: edhe taksa, për shkak të saj

Kryeministri i Kosovës Ramush Haradinaj edhe një herë ka akuzuar gruan në krye të diplomacisë evropiane, Federica Mogherini, si përgjegjëse për dëmin e shkaktuar në dialogun ndërmjet Serbisë dhe Kosovës, gjë që sipas tij ka shkaktuar dramë politike jo vetëm në Kosovë por edhe në rajon.

Ai tha këtë në një takim me rastin e 3-vjetorit nga nënshkrimi i Procesit të Stabilizim Asocimit të Kosovës me Bashkimin Evropian, në përgjigje të një deklarate nga shefja e Zyrës së BE-së në Kosovë Natalia Apostolova.

Ajo i bëri thirrje Kosovës që të zbatojë MSA-në dhe të heqë taksën prej 100 përqind për importet e produkteve nga Serbia dhe Bosnja, duke gjykuar se  nuk janë në frymën e kësaj marrëveshjeje.

“Imponimi i taksës 100 për qind për mallrat nga Serbia jo vetëm që shkel marrëveshjet e CEFTA-s, por ato nuk janë në frymën e MSA”, tha Apostolova.

Por për Haradinajn, është Mogherini përgjegjëse për këtë situatë.

“Ne nuk mund të arrijmë të gjitha objektivat e MSA-së, për shkak të vështirësive që na ka krijuar Federica Mogherini. E gjithë kjo është rezultat i bisedimeve në territoret”, ka thënë Haradinaj, duke ia atribuuar pikërisht asaj hedhjen e tezës për korrigjim kufijsh.

“Mogherini po shkakton trauma të mëdha në rajon”, theksoi Haradinaj.

Ky qëndrim i fundit i Haradinajt ndaj Mogherinit është në vazhdën e një kundërshtie të hapur të tij ndaj kryediplomates së Brukselit, shpërfaqur ç’prej kur u hodh teza e korrigjimit të kufijve. /tesheshi.com/