Kryeministri i Kosovës Ramush Haradinaj sapo ka mbaruar takimin me Kancelaren gjermane Angela Merkel, në Berlin, takim ky që i paraprin atij të Parisit, i cili thuhet të jetë pikënisje e re e dialogut mes Kosovës dhe Serbisë.
Pas takimit, Haradinaj tha se me Merkel ka biseduar për zhvillimet në rajon dhe marrëdhëniet bilaterale Kosovë- Gjermani.
Siç ndodh rëndom së fundmi, Haradinaj përdori rrjetin social Facebook për të treguar rezultatet e vizitës.
“I nderuar me ftesën e kancelares gjermane, Angela Merkel, në Berlin, për të diskutuar rreth zhvillimeve të fundit në rajonin tonë dhe për nivelin e lartë të marrëdhënieve bilaterale ndërmjet Kosovës dhe Gjermanisë. Sa i përket dialogut me Serbinë theksova se ne jemi për një marrëveshje gjithëpërfshirëse, ligjërisht obliguese, përfshirë njohjen reciproke, në kufijtë ekzistues”, ka shkruar Haradinaj në Facebook pas takimit.
Ai gjithashtu shtoi se falënderon kancelaren gjermane për qëndrimin e shtetit të saj rreth kufijve të Kosovës dhe për qëndrimin pro liberalizimit të vizave për kosovarët.
“Me këtë rast e falënderova Kancelaren Merkel për konsistencën e shtetit gjerman sa i përket mbrojtjes së sovranitetit dhe integritetit territorial të Kosovës si dhe për vendimin e Gjermanisë për t’i thënë PO heqjes së vizave për qytetarët e Kosovës të cilët, ndonëse i përkasin popullit më proeuropian, gjatë kohë janë mbajtur të izoluar”.
“Nga kancelarja Merkel mora konfirmimin se Gjermania do të vazhdojë ta përkrahë Kosovën në rrugën e saj euroatlantike dhe forcimin e subjektivitetit ndërkombëtar”, përfundoi ai. /tesheshi.com/
