Kryeministri Haradinaj i ka bërë thirrje presidentit Thaçi që të raportojë para Kuvendit për dialogun me Serbinë, edhe pse pranon që sKushtetuta nuk e parasheh diçka të tillë, përveçse në raste të jashtëzakonshme.
Sipas tij, duhet gjetur një formulë që komunikimi ndërinstitucional për procesin e dialogut të ekzistojë.
“Ndoshta do të ishte mirë që t’i raportojë Kuvendit. Pra, sipas bindjes sime, e rëndësishme është përfshirja e Kuvendit në procesin e dialogut. Ne, qeveria, komunikojmë me Presidencën dhe me presidentin, por është shumë me rëndësi që partitë parlamentare – edhe ato të opozitës, por edhe të komuniteteve – ta kenë një instrument komunikimi dhe ta dinë të vërtetën për dialogun”, theksoi Haradinaj.
Ai më tej tha se është shumë e rëndësishme që Kuvendi të jetë drejtpërdrejtë i përfshirë në procesin e dialogut me Serbinë.
Mbetet të shihet nëse Thaçi do t’i përgjigjet pozitivisht kësaj kërkese të kryeministrit për raportim para ligjvënësve për takimin e fundit që zhvilloi me homologun e tij serb, Alesandër Vuçiç. /tesheshi.com/
