Qeveria e Ramush Haradinajt është bërë strehë për njerëz nën aktakuzë. Prej fillimit të mandatit, pjesë e saj është Valdrin Lluka (ministri i Zhvillimit Ekonomik) i cili ndodhet në proces gjyqësor për konflikt interesi, ndërsa nga java e shkuar një aktakuzë është ngritur edhe ndaj ministrit të Inovacionit, Besim Beqaj, si një nga eksponentët e aferës “Pronto”.
Ministrat vetë nuk janë dorëhequr. Nga ana tjetër, kreu i qeverisë nuk e ka prekur asnjërin nga ta. Kësisoj, ai ka braktisur standardin e vënë nga ekzekutivi paraprak, për të mos përfshirë në kabinet ose për të liruar nga detyra njerëzit nën akuzë, shkruan Koha Ditore.
Në mandatin e shkuar sa ishte në opozitë, Haradinaj përdori aferën e përgjimeve “Pronto”, si armën kryesore kundër PDK-së. Por tash kur bashkëqeveris me këtë subjekt politik, nuk ka treguar nëse beson në pafajësinë e ministrit Beqaj, që pandehet për abuzimet e zbuluara nga përgjimet. /tesheshi.com/
