Lideri dhe kandidati i Aleancës për Ardhmërinë e Kosovës për kryeministër të sërishëm, Ramush Haradinaj ka thënë se taksa 100 për qind e importit për mallrat nga Serbia dhe Bosnja nuk duhet të hiqet por të rritet.
“Taksa është një instrument për krijimin e një vlere të ekuilibruar për njohje. Ne duhet ta fuqizojmë atë për të shkëmbyer njohje”, tha Haradinaj.
Ai tha se si kryeministër, i “tregoi se kush ishte zot shtëpie në Kosovë” dhe se ai “arriti të ndalojë idenë e shkëmbimit të territoreve” dhe të inicojë procese të tjera si Ushtria dhe Ligji i Trepçës.
Haradinaj thotë se Serbia nuk duhet të kërkojë diçka në këmbim të njohjes, por se duhet ta njohë Kosovën, të kërkojë falje ose të paguajë dëmet.
Deklarimet e Haradinajt vijnë në kuadër të fushatës elektorale të zgjedhjeve të parakohshme të 6 tetorit. Avantazhi i Haradinajt ndaj rivalëve të tjerë është pikërisht vendimarrja e tij e nëntorit të vitit të kaluar për ta taksuar mallrat serbe, si reagim ndaj politikës së Beogradit. /tesheshi.com/
