Nga Blendi Gashi
Partia e Ramush Haradinajt dhe ajo e Fatmir Limajt, gjatë mandatit të kaluar që ishin në opozitë, kritikuan jo pak qeverinë “Mustafa” për numrin e madh të ministrive, zv.ministrave e këshilltarëve duke thënë se po shpenzohen para koti për punësimin e militantëve.
Me ngulm zyrtarë të këtyre partive kërkuan që të zvogëlohet numri i ministrive.
Por AAK-ja dhe NISMA tashmë po e ndjekin rrugën e ekzekutivit të kaluar, pasi edhe qeveria “Haradinaj”, do jetë po aq e madhe për nga numri i ministrive, plot 21 të tilla.
E re në këtë mes është Ministria e Inovacionit dhe Ndërmarrësisë që do të drejtohet nga PDK, e cila siç duket është themeluar pas shkrirjes së njërës ministri pa portofol pasi kanë qenë dy të tilla.
Për më tepër qeveria e re do ketë numër më të madh të zv.kryeministrave, 5 të tillë, ose tre më shumë se ekzekutivi i kaluar.
Vendimi i koalicionit të ri qeverisës PAN-AKR-Lista Serbe, për të vazhduar me një superqeveri tregon qartë se premtimet e bëra dhe kërkesat e shoqërisë civile për zvogëlim të dikastereve qeveritare, nuk janë respektuar.
Për më keq, qeveria e re nuk po dëgjon as thirrjet e miqve ndërkombëtarë për çështjen në fjalë, kur dihet se ulja e ministrive u diskutua nga ish-koalicioni PDK-LDK pas vizitës që bëri zyrtarja amerikane Viktoria Nuland, çka u raportua edhe si kërkesë direkte e SHBA.
Sigurisht kjo sjellje dhe vendimi për të vazhduar me 21 ministri tregon qartë se bëhet për të kënqur militantët e të gjitha partive të koalicionit dhe këtë e dëshmon më së miri dhënia e nga një post të zv.kryeministrit për PDK-në, AKR-në, NISMA-n, Listën Serbe dhe çuditërisht Listës Rugova, sigurisht në këmbim të votës së deputetës Teuta Rugova për ta votuar qeverinë.
Megjithatë nuk duhet harruar se përveç ministrive, qeveria e re pritet të ketë edhe numër të njëjtë të zv.ministrave e këshilltarësh.
Kujtojmë se Instituti për Studime të Avancuara (GAP) në vitin 2016 kërkoi që të mbeten vetëm 13 ministri. Ky Institut kërkoi që në ombrellën e Ministrisë së Zhvillimit Ekonomik të operojnë, Ministria e Tregtisë dhe Industrisë, Ministria e Infrastrukturës si dhe ajo e Financave, pra të shuhen këto tre të fundit. GAP rekomandoi që të shkrihen edhe Ministria e Diasporës dhe ajo për Komunitete dhe Kthim.
Ministritë që do udhëheqin partitë e koalicionit PAN-AKR-Lista Serbe:
PDK: Një zv. kryeministër, Ministria e Financave, Ministria e Drejtësisë, Ministria e Integrimeve Evropiane, Ministria e Diasporës, Ministria e Kulturës dhe Ministrinë për Dialog dhe Ministria e Shëndetësisë.
AKR: Një zv. kryeministër, Ministria e Punëve të Jashtme, Ministria e Punëve të Brendshme, Ministria e Planifikimit Hapësinor, Ministria e Bujqësisë dhe Ministria e Zhvillimit Ekonomik.
NISMA: Ministria e Arsimit, Shkencës dhe Teknologjisë, Ministri e Tregtisë dhe të Industrisë, si dhe Ministria e Punës dhe të Mirëqenies Sociale.
AAK: Ministria e Infrastrukturës dhe Ministria e Forcës dhe Sigurisë së Kosovës (FSK).
LISTA SERBE: Ministria e Bujëqësisë, Ministria për Komunitete dhe Kthim dhe Ministria e Administrimit dhe Pushtetit Lokal
KOMUNITETET JO SERBE: Ministria e Administratës Publike dhe Ministria Pa Portofol
LISTA RUGOVA: Një zv.kryeministër dhe Ministria e Diasporës dhe Investimeve Strategjike /tesheshi.com/
