Ka reaguar gati 12 orë me vonesë Tirana zyrtare për arrestimin e Ramush Haradinajt, por që ka qenë e prerë dhe e fortë në qëndrimin e saj, ku dënon arrestin dhe akuzon Francën për sjellje jo-korrekte.
Me gojën e shefit të diplomacisë, Ditmir Bushati, qeveria shqiptare ka kërkuar lirimin e menjëhershëm të ish-kryeministrit të Kosovës.
Ditmir Bushati e ka cilësuar ndalimin të “dënueshëm, pasi, dihet botërisht,drejtësia ndërkombëtare e ka çliruar atë nga të gjitha akuzat”.
“I bëj thirrje autoriteteve franceze, si një prej shteteve me kontribut thelbësor për Kosovën shtet, të qartësojnë situatën duke liruar menjëherë Ramush Haradinajn. Çdo përpjekje e Serbisë për të përbaltur luftën çlirimtare të Kosovës do të dështojë, sikurse dështuan politikat genocidiste të Millosheviçit në Kosovë, të cilave Ramushi dhe UÇK-ja ju kundërvunë”, shprehet Bushati.
“Ky akt për fat të keq dëmton procesin e normalizimit të marrëdhënieve Kosovë-Serbi. Proces, i cili kërkon gjurmë provash të pakundërshtueshme, e jo përbetime artificiale, për të ecur me vendosmëri përpara, duke hequr dorë nga provokimet dhe aplikimi i metodave që s’kanë aspak lidhje me të ardhmen e përbashkët të Kosovës e Serbisë në familjen europaine”, shton Bushati në reagimin e tij. /teshehsi.com/
