Kreu i AAK-së, Ramush Haradinaj, ka propozuar që qeveria e Kosovës të ndërtojë një memorial kushtuar betejës së famshme të Fushë-Kosovës. Në ditën që për serbët quhet e Vidovdanit, Haradinaj ka reaguar me tezën e njohur të historiografisë shqiptare se nuk ishin vetëm serbët ata që luftuan kundër osmanëve, por dhe popujt e tjerë në një aleancë ballkanike. Dhe, për t’i sfiduar serbët që e kanë monopolizuar betejën, Haradinaj ka kërkuar që ata të sfidohen me një tjetër memorial.
Ja mesazhi i Haradinajt në origjinal, me të gjitha gabimet gjuhësore:
“Beteja e Kosovës e vitit 1389 është njëra prej datave të rëndësishme në Historinë e Kosovës dhe të Ballkanit.
Ushritë shqiptare të kohës, kanë qenë pjesë e një koalicioni të përbashkët të popujve të Ballkanit, në mbrojtjën e Kosovës dhe të civilizimit përendimor, dhe shumë prej tyre kanë rënë në fushën e Betejës së Kosovës. Shqiptarët kanë hise në historinë dhe në lavdinë e kësaj Beteje.
Në nderim dhe në përkujtim të këtyre ushtrive dhe luftetarëve të rënë në këtë Betejë, propozoj ngritjen e një memoriali në hapësirat ku është zhvilluar ajo!
Rrjedhimisht kërkoj nga institucionet e Republikës së Kosovës, që ta jetësojnë këtë projekt”
Sakaq, duhet kujtuar se tezën e një aleance ballkanike kundër osmanëve, e mbron dhe Kadareja. Por shkrimtari i njohur i shton një të dhënë për arsyen e humbjes së asaj beteje që shënoi më pas nisjen e sundimit otoman në Ballkan: ushtarët e aleancës ishin të dehur, pasi kishin konsumuar alkol një natë më parë edhe për t’u trimëruar. /tesheshi.com/
