Kryeministri Ramush Haradinaj, ka pranuar se ende nuk i kanë siguruar votat për ratifikimin e Demarkacionit me Malin e Zi, ndërsa nuk ka mundur të thotë nëse seanca do mbahet këtë javë apo jo.
“Jemi në diskutim për datën. Pra për ditën e seancës dhe në diskutime të brendshme, me u bashku votat, se janë dy të tretat. Se nuk është një proces i lehtë. Besoj që jemi në ato përgatitjet finale. Mund të ndodh në fund të kësaj jave. Eventualisht në fillim të javës tjetër. Por nuk do të shtyhet më shumë… Jemi në komunikim dhe me Listën Serbe dhe me deputetët tjerë të partive politike shqiptare, me komunitetet… por ende nuk është definitive 2/3. Për ata jemi duke punuar që t’i kemi 2/3 e votave. Sikur t’i kishim sot të garantuara 2/3 të votave, sot do ta thirrshim seancën. Por meqenëse ende si kemi 2/3, pra koalicioni qeverisës, partitë shqiptare, komunitetet jo serbe e kanë dhënë votën. Lista Serbe ende jo. Pastaj kemi LDK-në që është deklaruar pro. I ka dhe disa detaje që duhet me i pastru me ta. Shpresoj që do të kemi dhe deputetë të tjerë shqiptar që do ta japin votën”, tha ai.
Ai ka pranuar se janë duke diskutuar me Listën Serbe për të bërë 2/3 e votave, por që nuk ka ende diçka konkrete.
“Në diskutim e sipër ka plot tema që trajtohen, që po diskutohen. Mirëpo ende nuk kemi një dakordim për votë”, tha Haradinaj. /tesheshi.com/
