Kryeministri Ramush Haradinaj është tërhequr përkohësisht nga rritja e pagës ndaj vetes dhe anëtarëve të tjerë të kabinetit qeveritar që kryeson, deri sa për këtë të shprehet Gjykata Kushtetuese. Vendimi ka ardhur pasi ditë më parë, agjencia Anti-Korrupsion në Kosovë, e nxorri rritjen e pagave edhe si të paligjshëm, pos kontestimit moral që akti i Haradinajt po ndeshte në opinion.
Ndërsa për shefin e qeverisë së Prishtinës, gjykimi i Agjencisë Kundër Korrupsionit ka prapavijë politike.
Haradinaj bën të ditur se pas kërkesës së 30 deputetëve për vlerësimin e kushtetueshmërisë së vendimit për nivelizim të pagave, të marrë më 20 dhjetor nga qeveria, ka vendosur që përkohësisht, deri në një vendim të Gjykatës Kushtetuese, ta kërkoj pezullimin e këtij vendimi.
“Shqetësimi im dhe i Qeverisë është se ky pezullim godet më së shumti gjyqtarët dhe prokurorët, duke qenë se pagat e tyre janë të ndërlidhura drejtpërdrejt me vendimin për nivelizimin e pagave. Pa marrë parasysh epilogun e kësaj çështjeje, ne do të përpiqemi që të gjejmë mënyrën për të siguruar përkrahjen e plotë për gjyqtarët dhe prokurorët në vend”, shkruan Haradinaj në Facebook.
Kujtojmë se Haradinaj rriti për 100% pagën e tij nga 1500 në 2950, poashtu rriti edhe pagën e ministrave e këshilltarëve të tij.
Ai e arsyetoi vendimin me nevojën e ministrave për këmisha e kollare. /tesheshi.com/
