Në një intervistë për Financial Times, kryeministri Haradinaj shpjegoi se përse u ndërmorr masa e tarifave doganore ndaj Serbisë, për mallrat e saj të importuara në Kosovë.
“Nuk e kemi bërë këtë për shkak të arrogancës, nuk kemi pasur asnjë zgjedhje tjetër”, ka Haradinaj, duke shtuar më pas se vetëm njohja e Kosovës nga Serbia do mund t’i zhbënte ato.
“Ne rezistuam marrjen e kësaj mase për një kohë të gjatë, por nuk kishte rrugëdalje tjetër. Tarifa do të hiqet me normalizim të plotë, dhe normalizim i plotë do të thotë njohje”, ka theksuar shefi i qeverisë së Kosovës.
Pos kësaj, Haradinaj akuzoi Serbinë për mosrespektim të marrëveshjeve. “Ne jemi ankuar (në Komisionin Evropian) gjatë gjithë këtyre viteve për Serbinë që nuk respekton CEFTA-n, duke mos respektuar marrëveshjet e Brukselit, duke mos respektuar premtimet e tjera të dhëna në tryezë, por ata nuk ishin aq të përqendruar te ne”, tha Haradinaj.
Sipas tij, “të gjitha veprimet e Serbisë janë kundër interesave të BE-së për të stabilizuar Ballkanin Perëndimor dhe në interes të Rusisë për të mbajtur situatën kaotike në rajon”. /tesheshi.com/
