Kryeministri Ramush Haradinaj ka lënë të kuptuar se edhe mund të ketë një falje për serbët nëse këta të fundit do e njohin pavarësinë e Kosovës. Komentet ëe tij u bënë teksa mbrojti qëndrimin se shkëmbim territoresh nuk do të ketë.
“Interesi ynë është të përfundojmë çështjet e pazgjidhura mes Kosovës dhe Serbisë, si njohja e Pavarësisë. Jemi përgatitur gjithashtu për të falur, por nuk bëhet fjalë për shkëmbime territoresh. Nëse e hapim këtë çështje do të jetë një histori pafund. Kështu që jam plotësisht kundër”, tha Haradinaj.
Sipas tij, nëse preken kufijtë apo diskutohen territore, kjo do përkthehej me një luftë të re.
“Ne, shqiptarët e Kosovës jemi viktima të konflikteve territoriale. E gjithë bota u ngrit në këmbë për të ndalur atë që po ndodhte, kështu që jam totalisht kundër prekjes së çështjes së kufijve, ndryshimit apo shkëmbimit të tyre. Kjo do të çonte në tragjedi të re”, theksoi shefi i qeverisë së Prishtinës.
Komentetet e tij vijnë ndërsa presidenti Vuciç pritet të paraqesë një plan për Kosovën, duke paralajmëruar lëshime në disa çështje për hir të së ardhmes. Dhe kjo mund të jetë vetë njohja e pavarësisë së Kosovës. /tesheshi.com/
