Duke nuhatur afrimin e vendimit të qeverisë “Kurti” për heqjen e taksës, ish-kryeministri Haradinaj, vendosës i saj, shprehu pabesimin e tij ndaj SHBA si garant për arritjen e një marrëveshjeje finale, pas së cilës vinte dhe njohja. Pak orë pas mesazhit të Isa Mustafës, i cili arsyetonte heqjen e taksës nën garanci amerikane, Haradinaj shkruan:
“Kosova nuk ka asnjë garancë se heqja e taksës 100% për produktet e Serbisë e sjellë Marrëveshjen Finale për njohjen reciproke në kufijtë ekzistues”.
Për më tepër, Haradinaj shkon më larg kur thotë se Kurti po i hap rrugë, sipas tij, pushtimit ekonomik të Kosovës nga Serbia.
“Sot, Serbia vazhdon të armatoset nga Rusia me pajisjet me të reja ushtarake, ndërsa qeveria Kurti premton heqjen e taksës duke siguru pushtimin ekonomik të Kosovës nga Serbia”, shprehet Haradinaj.
“I bëj thirrje publike Kurtit dhe partnerëve të tij qeverisës që mos të hiqet taksa pa njohje.
Pushtetet nuk janë asgjë kur është në pyetje ruajtja dhe mbrojtja e sovranitetit të vendit.
Tregu vetëm për njohje!”, përfundon mesazhin e tij Haradinaj. /tesheshi.com/
