Ndërsa Kadri Veseli i PDK-së gjatë fushatës zgjedhore po hesht për Demarkacionin me Malin e Zi, partnerët e tij të koalicionit AAK dhe NISMA mbeten të palëkundër në qëndrimet e tyre se version aktual nuk do të ratifikohet as nga qeveria e re.
Ramush Haradinaj, kandidat për kryeministër ka entuziazmuar jo pak qytetarët e Pejës pjesmarrës në tubimin zgjedhor me ç’rast ka premtuar se kufiri nuk do të bije nga Qafa e Çakorrit.
“Nuk ka post, nuk ka pushtet, nuk ka forcë që më ligë që kufini të bie nga Qafa e Çakorrit”, ka thënë i vendosur Haradinaj, edhe pse po heziton të tregojë nëse ka folur apo jo me partnerin kryesorë të koalicionit PDK-në dhe kreun e saj Veseli për këtë temë, kur dihet se mandatin e kaluar kanë qenë “pro”.
Për Demarkacionin ka folur sot në Prizren edhe kandidati për deputet i NISMA-s, Zafir Berisha, i cili ka thënë se versioni aktual i demarkimit të kufirit me Malin e Zi nuk do të kalojë, derisa ka bërë të ditur se partia e tij nuk do ta japë votën as për “Zajednicën”.
“Ne nuk do ta votojmë versionin aktual të demarkacionit dhe as asociacionin”, ka thënë Berisha, para bashkëqytetarëve të tij.
Kujtojmë se Ulrike Lunaçek, raportuese për Kosovën në Parlamentin Evropian së fundmi ka thënë se “PDK e LDK duhet t’u tregojnë koalicioneve të veta se kanë pranuar marrëveshjen për Demarkacionin” /tesheshi.com/
