Kreu i AAK-së, Ramush Haradinaj, edhe një herë në mënyrë të prerë ia ka bërë të qartë pushtetit se zhbllokimi i Kuvendit do të ndodhë vetëm nëse anulohen marrëveshjet nga versioni ekzistues i saj.
Ai thotë se fuqinë e njëjtë që e ka Kushtetuesja për të ndaluar këto marrëveshje, e ka në dorë edhe kryeministri Mustafa, i cili sipas tij, mund t’i anulojë ato nëse ka veç vullnet të mirë politik.
“Ne jemi në qëndrimet e njëjta. Ne do të vazhdojmë të kundërshtojmë dy marrëveshjet. Anulimi i marrëveshjes për Asociacionin është dalje nga gjendja aktuale. Kryeministri Mustafa duhet me i anulu sa më shpejt dhe më pastaj të ulemi të bisedojmë”.
“Ne si opozitë nuk jemi në pozitë të lehtë. Ajo që po ndodh në Parlament është një keqe e vogël që po ndodh për me ndal një keqe të madhe.
Do të rrijmë në rrugë, do të bëhemi barrikadë që të mos zbatohen këto marrëveshje”, ka deklaruar Haradinaj, në emisionin Rubikon të KTV-së, transmeton portali tesheshi.com.
“Mustafa, Thaçi e Meha s’po duan të marrin vesh”
Kreu i AAK-së, i ka bërë edhe njëherë thirrje Qeverisë që të përmirësojë marrëveshjen për demarkacionin me Malin e Zi para së të sillet në Kuvend.
Ai ka thënë se problemi kryesor këtu po vjen pikërisht nga njerëzit që marrin rrogën për këtë punë, kryeministri, ministri dhe Murat Meha.
“Duhet të formohet një Komision hetimor të shikohen lëshimet që ka bërë Komisioni Shtetëror për Shënimin e Kufirit me Malin e Zi.
I kanë shku kryeministrit Mustafa njerëz të partisë së vet natën që t’i thojnë se e ka gabim. Pse nuk e hapin këtë temë nëse është gabim. Këta njerëz nuk marrin vesh”, është shprehur Haradinaj.
Kreu i AAK-së ka deklaruar më tej se Kosova rrezikon shumë, pasi njerëzit e brezit kufitar me Malin e Zi janë në gjendje të vdesin për tokat e tyre.
“Qeveria ka mundësi t’i ndalë këto marrëveshje e mos të na torturojë më… ata njerëz janë të gatshëm të mos heqin dorë për këtë, për tokat e tyre. Më mirë ne të hamë shishe të ujit kresë sesa të na vdesë ndokush në kufi. Pra, ne në fakt po i parandalojmë disa gjëra”, ka theksuar Haradinaj.
Ashpërsimi i gjuhës – Nuk i kërkon falje Mustafës
Haradinaj, është pyetur për ashpërsimin e fjalorit, ku është pyetur nëse do t’i kërkoj flaje kryeministrit Mustafa të cilin e quajti “qen”.
“Për të më kërkuar falje ka pasur mundësi të më thërrasë në telefon, numrin tim e ka dhe për mos me zgjatë këtë farë punë. E jo më prit një javë a katër, e me ardhë të ti, për të thënë se i kërkoj falje e në ndërkohë ne e kemi vazhduar pingpongun. Unë atë që thash për të atë ditë në Kuvend e kam bërë në afekt dhe nuk e di nëse është e nevojshme për të kërkuar falje”, ka deklaruar Haradinaj.
Përgatiti: Blendi Gashi – /te sheshi.com/
