Kryeministri Haradinaj e quajti si të gabuar qëndrimin e Uashingtonit e Brukselit, mu për faktin se i kërkojnë heqjen e taksës ndaj Serbisë, duke iu bindur kësaj të fundit në kushtin e venë për rinisjen e dialogut, që është pikërisht taksa.
“Është gabim pozicioni edhe i Uashingtonit edhe i evropianëve, edhe i Berlinit, edhe i Parisit, që t’ia pranoj kushtin Serbisë për vazhdimin e dialogut me heqjen e tarifës”, tha shefi i qeverisë së Prishtinës në një tryezë të organizuar nga Instituti Demokratik i Kosovës me temë “Dialogu Kosovë-Serbi pas Samitit të Berlinit”.
Gjithsesi, Haradinaj tha se serbët janë fqinj, e me fqinjët duhet jetuar në paqe. Ai shtoi se është pikërisht dëshira për paqe që e kish çuar dhe në Berlin.
“Ne jemi fqinjë shqiptarët dhe serbët. Nuk mund më të zgjedhim, dhe nuk ka si ndryshon kjo. Dy fqinjë mund të zgjedhin a duan të jetojnë në telashe apo në paqe. E vërteta është që e kaluara është telashe, nënkupton tragjedi, dhimbje e shumëçka tjetër. A vjen ndonjë brez që dëshiron ta ndryshojë këtë? Në Kosovë jemi të interesuar për paqe, jemi të interesuar të kalojmë në ardhmëri. Besoj që kjo është vërtetuar me pjesëmarrjen tonë në dialog”, theksoi Haradinaj. /tesheshi.com/
