Kryeministri Ramush Haradinaj, ka vizituar në orët e hershme të mëngjesit Korporatën Energjetike të Kosovës, ku është njoftuar nga menaxhmenti për situatën aktuale me furnizim me energji elektrike.
Ai nuk mohoi krizën energjetike që ka Kosova, duke thënë se gjendja është e vështirë, përkundër faktit se në kryeqytet ka më pak reduktime.
“Nëpër vendbanime, nëpër fshatra të largëta, reduktimet janë më të mëdha, por përkeqësim më të madh të gjendjes nuk pritet. Kjo nuk është gjendja e duhur, por po i vuajmë pasojat e mos punës në të kaluarën”, tha Haradinaj.
Megjithatë ai pohoi se ka marrë zotim nga menaxhmenti i KEK-ut se rrymë do ketë 24 orë.
“Gjendja është nën kontroll. Tani e tutje do të blejmë rrymë sepse rezervat e thëngjillit janë të pakta për të punuar të gjitha njësitë, mirëpo gjendja është stabile. Mora zotim nga menaxhmenti që do ta rrisim angazhimin me kujdestari të vazhdueshme 24 orë, nga tash deri në muajin mars”, tha kryeministri.
Ndërkaq drejtori menaxhues i KEK-ut, Arben Gjukaj, tha se Korporata Energjetike e Kosovës ka kaluar një sfidë e cila është ndër sfidat kryesore ose më e madhja që pas luftës, që është shpronësimi.
“Fal angazhimit të qeverisë, ministrive përkatëse dhe komunës, ne kemi arritur ta përmbyllim dje regjistrimin e pronave dhe presim që brenda kësaj jave ta përmbyllim përfundimisht dhe të fillojmë me punë”, tha Gjukaj. /tesheshi.com/
