Dy liderët e opozitës, Visar Ymeri dhe Ramush Haradinaj kanë thënë se kjo protestë është argumenti më i madh se tashmë ka ardhur koha që kjo qeveri të largohet nga qeverisja.
“Kjo është një porosi e qartë që ka ardhur koha që Isa Mustafa dhe Hashim Thaçi të shkojnë”, ka thënë Ramush Haradinaj. Ndërkohë Visar Ymeri ka shtuar se qytetarët sot po vërtetojnë se nuk pajtohen me këto marrëveshje dhe as me shkeljen e kushtetutës.
“Në ditët e fundit të tyre, për ta shpëtuar lëkurën e vet edhe ndonjë ditë, e treguan dhe po e tregojnë egërsinë e tyre duke arrestuar e shtypur opozitën, e cila iu tha jo këtyre. I tha Jo – korrupsionit që e ka varfëruar Kosovën, JO – Kosovës pa ushtrinë e vet, JO “Zajednicës” që na e bjen Serbinë në Kosovë, JO – demarkacionit, që nga Çakorri e bjen kufirin në Kuqishtë dhe nga Kulla e Zhlepit në Savino Vodë”,- tha Haradinaj.
Sipas tij, ata po e humbin fuqinë, po e humbin kontrollin, këta po shkojnë, e bashkë me ta edhe korrupsioni, edhe “Zajednica” edhe demarkacioni. /tesheshi.com/
