Ramush Haradinaj, i sulmuar tashmë në front nga Beogradi për t’u penalizuar me çdo kusht, me anë të një statusi në FB i ka kujtuar Ivica Daçiçit, kreut aktual të diplmacisë serbe, se cili ka qenë deri para pak vitesh ndërsa ai luftonte për lirinë e vendit të tij; një njeri i afërt me kriminelin Millosheviç.
Për ta bërë sa më të plotë denoncimin e së kaluarës së tij, Haradinaj e ka shoqëruar më një foto-fakt, si për t’i kujtuar opinionit, sidomos atij ndërkombëtar, se çfarë skote i përket njeriu që drejton sot diplomacinë serbe.
Vetë Daçiç, është investuar personalisht këto javë kundër Haradinajt, me një strategji të qartë për të ndikuar sa më shumë tek drejtësia franceze që ish-komandanti i UÇK-së për Dukagjinin të shihet si kriminel lufte. Por ja se kush është krimineli i vërtetë sipas Haradinajt:
Kur të vërsulet krimineli!
Ivica Daçiq, ka hapur luftë personale me mua, që e kam mbrojtur shtëpinë e popullin tim dhe po i harron krimet që i ka kryer vet e shokët e tij edhe në gra e në fëmijë.
Unë kam qenë luftëtar lirie e jo pushtues e vrasës si ai e shefi i tij!
Pavarësisht se kam bërë luftë mbrojtjëse e në përputhje me ligjet ndërkombëtare të luftës, unë i jam përgjigjur drejtësisë ndërkombëtare, e nuk jam fshehur si ai qindra zyrtarë të tjerë serbë, të cilët bashkë me Daçiqin, i kanë zhdukur dëshmitë e krimeve të kryera në Kosovë!
Daçiqi duhet të flasë për krimet e tij e të shokëve të tij, e të mos kujtoj që i shlyen krimet e veta duke shpifur ndaj meje!
Unë kurrë nuk jam shqetësuar kur më janë vërsulur kriminelë të tipit të tij, as në 98-99 e as sot!
Ai duhet të shqetësohet për krimet e veta, sepse unë kam dalë i pastër si loti!
Hala nuk është vonë që drejtësia ndërkombëtare ta shohë e ta gjykojë jetën kriminale të Ivica Daçiqit dhe jo vetëm!
RH /tesheshi.com/
