Kreu i Aleancës për Ardhmërinë e Kosovës, Ramush Haradinaj dha dorëheqjen nga komisioni i Jashtëm i Kuvendit për shkak se e konsideron atë një instrument politik të kryeministrit Mustafa.
Deputeti i AAK-së deklaroi se komisioni është shndërruar në vegël të Mustafës e Thaçit, duke humbur rolin që duhet të kishte.
“Meqenëse në disa raste, ky komision ka paraqitur edhe raporte apo dokumenta të korruptuara, siç është edhe raporti i komisionit shtetëror për Demarkacion, unë nuk e shoh veten pjesë të këtij instrumenti dhe lojërave politike që po provohen të kryhen përmes tij”, thuhet në njoftim të AAK-së për dorëheqjen e Haradinajt.
Demarkacioni me Malin e Zi, marrëveshja për të cilin u nënshkrua gjatë samitit të Vjenës, ishte kundërshtuar ashpër nga Haradinaj. Ky i fundit, përmes një letre publike akuzonte komisionin shtetëror të Demarkacionit se e kishte hartuar raportin përkatës mbi baza korrupsioni dhe se demarkacioni i hiqte Kosovës territore.
Dorëheqja e Haradinajt vjen pas debateve të ashpra në komisionin për Politikë të Jashtme ku ai u largua në mënyrë demonstrative gjatë raportimit të ministrit Enver Hoxhaj mbi marrëveshjen e demarkacionit me Malin e Zi. /tesheshi.com/
