Kryetari i AAK-së, Ramush Haradinaj, insiston në mbajtjen e zgjedhjeve të reja, por ai nuk tregon nëse do të shkojë të hënën në takim te presidentja, Atifete Jahjaga, e cila sërish ka ftuar partitë politike në përpjekje për të gjetur një zgjidhje, edhe pse takimet e mëparshme nuk kanë dhënë rezultat.
Haradinaj, thotë se shkuarja në zgjedhje në këtë kohë do të ishte precedent pozitiv për të ardhmen e vendit.
Ai deklaron se për një shoqëri, e cila synon të jetë demokratike, nuk ka precedent më të mirë për shkuarje në zgjedhje, e cila vjen pas shkeljes së Kushtetutës nga ana e Qeverisë.
Haradinaj, në një postim në Facebook, ka shkruar se nëse shkohet në zgjedhje, garantohet se për çështje të rëndësisë së veçantë, përgjegjësia e institucioneve duhet të jetë e nivelit më të lartë.
Ndryshe, mazhoranca në vijimësi po insiston se zgjedhjet parlamentare do të mbahen vetëm kur të vijë koha, pra në vitin 2018-të. /tesheshi.com/
