Pas dërgimit të marrëveshjes së Demarkacionit në Kuvend, kanë ardhur edhe reagimet e para të kryeministrit Haradinaj e kryeparlamentarit Veseli, që hapur i kanë shpallë “luftë” njëri-tjetrit për këtë çështje.
Haradinaj ka mbështetur punën e njeriut të tij për këtë marrëveshje Shpejtim Bulliqi, duke e quajtur raportin kredibil dhe mbajtur qëndrimin se Kosova me versionin e tanishëm është dëmtuar në tërësinë e saj tokësore.
“Bazuar në kriteret e prezentuara për demarkimin e kufirit shtetëror, që kanë aplikuar të gjitha shtetet që kanë dalë nga ish-Jugosllavia, aty ku ka shpërputhje kadastrale duhet të përkufizohet mbi bazën e vijes administrative. Kështu ka vepruar edhe Gjykata e Arbitrazhit në verdiktin për rastin slloveno-kroat. Komisioni Shtetëror e ka argumentuar fuqishëm parimin uti possidetis juris, me çka dëshmohet se deri në Kullë dhe Zhlep, territori është menaxhuar nga Kosova. Vetëm 17% e territorit të Malit të Zi, deri më 2013, është përfshirë në regjistrat kadastralë të kësaj republike”, ka shkruar Haradinaj në Facebook.
Por qëndrim tjetër ka partneri i koalicionit, Kadri Veseli, i cili ka bërë të ditur se deputetët e partisë së tij do votojnë “pro” marrëveshjes.
“Qëndrimi i Partisë Demokratike të Kosovës është i qartë. Marrëveshja duhet të kalojë dhe vota jonë është ‘pro’, siç e kemi thënë në vazhdimësi. Izolimi i qytetarëve tanë duhet të marrë fund. Presim nga Bashkimi Evropian liberalizimin e vizave” ka shkruar Veseli në Facebook.
Kujtojmë se tashmë është Kuvendi i cili vendos se kur kjo marrëveshje do të dalë për votim para deputetëve, por që aktualisht nuk ka një datë se kur mund të ndodhë. /tesheshi.com/
