Nga Blendi Gashi
Kryeministri Ramush Haradinaj, siç duket po ndjek modelin e homologut të tij Edi Rama, sa i përket komunikimit me gazetarët. Ndërsa ky i fundit i quan një pjesë të mediave në Shqipëri, kryesisht jashtë kontrollit të tij si kazanë, Ramushi të mërkurën në një konferencë për media, gazetarët kosovarë i ka quajtur të pashkollë, kjo pasi nuk i ka pëlqyer një pyetje që i ka bërë një gazetareje lidhur me qëndrimin e Amerikës për Demarkacionin.
“Kam respekt për media shumë, por shumica prej juve, as nuk dini të lexoni anglisht, as nuk po dini t’i kuptoni se çfarë kanë thënë, problemi është i juaji, nuk kam ndonjë koment. Ju po raportoni pa ditë se si po raportoni, besoni, shkoni më shumë në shkollë, shikoni çfarë po thonë ata. E kam lexuar deklaratën e amerikanëve dhe kjo që po thua ti nuk është ashtu. Nuk ka asnjë fjalë diku që thotë ‘nuk pajtohemi me këtë apo me atë’”, ju drejtua kryeministri një gazetareje.
Ky deklarim i kryeministrit nuk i pëlqeu aspak Asociacionit të gazetarëve që reaguan duke thënë se kreu i qeverisë s’do të mund ta kontrollojë përmbajtjen e pyetjes së gazetarëve.
“Duke përcjellë me shqetësim këtë deklarim të kryeministrit të ri, ne rikujtojmë se misioni i gazetarëve është që të bëjnë pyetje sa herë që ata kanë nevojë për përgjigje ndërkohë që përmbajtjen e pyetjes nuk do të mund ta kontrollojë askush. AGK kërkon nga kryeministri Ramush Haradinaj që të jetë bashkëpunues me gazetarë si dhe të punojë intensivisht në rritjen e bashkëpunimit me media si dhe transparencës së qeverisë”, thuhet në reagimin e AGK-së.
Edhe pas këtij reagimi dhe të tjerave nga komuniteti i gazetarëve, Haradinaj nuk u zmbraps duke thënë se “mund të përdor gjuhë më të butë me gazetarët, por e vërteta mbetet”.
Ndërsa drejtori i zyrës për Marrëdhënie me Media në Kryeministri, Halil Matoshi, i ka dalë në mborjtje shefit të tij duke thënë se është keqkuptuar.
“Haradinaj askujt, asnjëherë nuk i ka thënë që jeni të pashkollë. Ai ka thënë që duhet më shumë mund, etikë profesionale dhe më shumë shkollë. Të gjithëve na duhet më shumë shkollë. Në këtë situatë po bëhet një fushatë e pakuptimte kundër Haradinajt”, ka thënë Matoshi.
Ja gazetarët që Haradinaj i mori afër vetës
Haradinaj mund të ofendojë gazetarët dhe mund të ketë të drejtë se jo të gjithë mund të jenë të përgatitur profesionalisht, por megjithatë AGK ka të drejtë kur thotë se nuk mund t’i mësoi se ç’pyetje mund të parashtrojnë.
Megjithatë, nuk duhet harruar se Haradinaj e ka forcuar partinë e tij para fushatës zgjedhore pothuajse në tërësi me gazetarët të cilët i prezantonte me shumë mburrje, ndërsa tani i ka edhe në ekipin e tij si kryeministër.
Gazetarët që aderuan në AAK janë: Muharrem Nitaj (i vetmi i aderuar para fushatës), Arbër Vllahiu, Halil Matoshi, Shaqir Foniqi, Asllan Bajrami, Melazim Koci, Veli Bytyqi, dhe Naim Bunjaku (Xuxi).
Disa prej tyre Haradinaj tashmë u ka besuar funksione të mëdha.
Nitaj ka qenë në listën për deputet por që nuk ka arritur të marrë votat, ndërsa mbetet njëri nga njerëzit më të afërt të Haradinajt. Aktualisht mban pozitën e zëdhënësit të partisë.
Vllahiu ndërkaq është i nominuar si kandidat i AAK-së për kryetar të Prishtinës, ndërsa po shifet edhe pranë Haradinajt në takimet që po zhvillon si kryeministër.
Matoshit i është besuar detyra e drejtorit të zyrës për informim në Kryeministri.
Ndërsa ende zyrtarisht nuk janë emëruar ende në ndonjë detyrë në institucione ish-gazetarët Bajrami, Koci, Bytyqi e Bunjaku. /tesheshi.com/
