Kandidati për kryeministër nga koalicioni PDK-AAK-NISMA, Ramush Haradinaj, beson se brenda dhjetë ditësh Kosova do të ketë institucionet e reja. Ai këtë e mbështet në reflektimin që është bërë ditët e fundit në skenën politike, duke aluduar në ultimatumin që kreu i AKR-së Behgjet Pacolli ka dhënë për Vetëvendosje e LDK-në dhe pas takimit që ka pasur kokë me kokë me të edhe pse nuk tregon detajet e takimit.
“Ajo që mund të konfirmoj është një ndjenjë e përgjegjësisë nga vet zoti Pacolli, pra e ndjen përgjegjësisë që gjendja nuk mund të shkojë pa kufi kështu. Vetë Pacolli e ka një përvojë të jashtëzakonshme në shumë çështje dhe jam i bindur se ai do të japë kontributin e vet edhe në konstituimin e institucioneve dhe qeverisjen në vend.
Tani besoj se është pak më e qartë gjendja. Pra, ka një reflektim të spektrit politik, ashtu siç e thash më herët, dhe besoj që në këto ditët që po vijnë, në këto 10 ditë do të jemi në gjendje që t’i marrim vendimet e duhura për të konstituuar Kuvendin, t’i zgjedhim organet drejtuese dhe njëkohësisht edhe formimin e qeverisë”, ka thënë Haradinaj në një intervistë për Radion “Evropa e Lirë”.
Kreu i Aleancës ka konfirmuar sërish se kandidati i vetëm për postin e kryeparamentarit nga PAN është Kadri Veseli.
“Nuk ekziston kategori kushtetuese ose nuk ekziston rregull i paraparë, që i jep të drejtën partive të tjera të interferojnë në përzgjedhje. E ka thënë gjykata, është e drejtë ekskluzive e PAN-it. PAN mund të vendosë në një mënyrë apo në një tjetër, por e ka paraparë, e ka kandiduar zotin Veseli dhe ai është kandidati për kryetar Parlamenti”, ka deklaruar Haradinaj. /tesheshi.com/
