Nga Blendi Gashi
Premtimi për liberalizim vizash, ka qenë ndër më aktivet tash e 7 vjet në Kosovë, nga parti që kanë qenë në pushtet ose që kanë aspiruar pushtetin. Edhe pse nuk ka ndodhur, kjo nuk i detyruar forcat politike që të jenë më të përmbajtura; dhe, në këtë valë të nxehtë premtimesh, si qershia mbi tortë qëndron dhe ajo për heqjen e vizave. Mirëpo siç dihet, ndërkombëtarët kanë vendosur një kusht të panegociueshëm për liberalizimin: Demarkacionin dhe Asosacionin. Pra, para se të premtohen vizat, duhet të premtohet që këto dy kushte do plotësohen me ratifikimin në parlament. Kaq e thjeshtë është. Por ndërsa kjo e dyta nuk përmendet, ratifikimi pra, e para, liberalizimi i vizave, është në majë të gjuhës.
Në dy palë zgjedhje të kaluara, Thaçi ishte kampioni i premtimit për vizat, ndërsa tashmë vendin e tij e ka zënë Ramush Haradinaj, kandidati për kryeministër nga koalicioni PDK-AAK-NISMA, i cili hem përbetohet se nuk do lejojë Demarkacionin e hem se do heqë vizat. Madje për tre muaj.
Por si i shohin specialistët e fushës këto premtime?
Besa Shahini, njohëse e integrimit evropian, shprehet e bisndur se nuk ka gjasa që vizat të heqen tre muaj pasi të formohet qeveria e re, edhe nëse Demarkacioni kalon qysh ditën e parë.
“Edhe nëse fiton Ramush Haradinaj dhe qysh ditën e parë e procedon Demarkacionin në parlament, dhe votohet nga shumica e nevojshme e deputetëve, prapë nuk do bëhet liberalizimi i vizave për 90 ditë. Komisioni Evropian do të merr pak kohë që të vërtetojë nëse kërkesa tjetër për liberalizim, luftimi i krimit të organizuar është përmbushur. Pastaj Parlamenti Evropian duhet ta fus çështjen e Kosoves në agjendë, që merr kohë. Nëse kalon në PE, vendimi duhet të shkoje tek Keshilli i Ministrave, ku ma merr mendja se do të ngecë procesi ngaqë shtetet anëtare janë skeptike për liberalizimin e vizave për Kosovën. Për ta Kosova ende paraqet rrezik migrimi”, thotë Shahini, për tesheshi.com.
Shefqet Dibrani, analist politik, thotë se sikur çështja e liberalizimit të vizave të varej nga vullneti i Haradinajt, kjo gjë do të bëhet realitet edhe më shpejt se sa 90-ditshi i parë në qeverisjen e vendit.
Ai përmend faktin se me liberalizimin e vizave drejtpërdrejt lidhet çështja e Demarkacionit e cila sipas tij mund të zgjidhet shumë shpejt.
“Për fat të keq çështja e liberalizimit nuk përfundon me kaq. Korrupsioni i madh dhe siguria e brishtë janë dy çështje të tjera kyçe dhe të rëndësishme për këtë proces të cilat nuk mund të kryhen brenda 90 ditëshit të parë. Edhe nëse çështjen e korrupsionit, ta zëmë se e zgjidhin diqysh, siguria e brishtë e komplikon këtë proces. Sivjet pritet të fillojë funksionimi i Gjykatës Speciale e cila do të rris tensione në Kosovë, ndërsa institucionet e sigurisë janë të brishta ku pasiguria do të shtohet dhe çështja e vizave automatikisht do të shtyhet”, thotë Dibrani, për tesheshi.com. /tesheshi.com/
