Kryeministri Rama u vizatoi një të ardhme krejt tjetër banorëve të Shishtavecit, ndryshe nga aktualja, duke promovuar efektin e futjes në funksion të aeroportit të Kukësit.
“Unë besoj shumë që në këtë zonë ne do të shohim modelet e para të zhvillimit të turizmit malor edhe për një arsye tjetër, sepse këtu në Kukës, besoj në fillim të vitit të ardhshëm do të nisë ndërtimi i aeroportit të Kukësit.
Aeroporti ekzistues do të transformohet tërësisht në një aeroport të standardeve ndërkombëtare për fluturimet me çmime të ulëta dhe studimi që ne kemi bërë me ekspertë të huaj na ka inkurajuar shumë, edhe mua më ka entuziazmuar shumë, sepse të gjitha analizat e bëra sipas metodave profesionale të parashikimit për suksesin e një biznesi tregojnë se aeroporti i Kukësit do të lëvizë në një mesatare prej 300 mijë udhëtarësh në vit”, tha shefi i qeverisë.
Rama i ftoi banorët e Shishtavecit, fshatit te patateve e skijimit, që të investojnë, sidomos në turizmin dimëror, për të përfituar nga efektet e aeroportit që, siç ka premtuar, do hapet së shpejti.
Aeroporti i Kukësit, financuar nga arabët, nisi të ndërtohej në fillim të viteve 2000, por ç’prej atëherë rrotë avioni nuk është ulur apo ngritur. As në qeverisjet e Ramës, e as në ato të Berishës, kurrë nuk u morën me fatin e aeroportit të mbetur “stok”. /tesheshi.com/
