Siç dhe pritej shkëndijat e referendumit të Katalonjës për pavarësi kapën edhe Ballkanin.
Vojvodina, krahina lindore e Serbisë që ka një numër të madh hungarezësh, ka lëvizur duke kërkuar një status të ri.
Por, Perëndimi kërkon ta mbajë Serbinë stabël që të mos e trondisë ekuilibrin e saj, nëse Vuçiç do të mbyllë Kosovën dhe do të presë marrëdhëniet me Rusinë.
Nëse do të vazhdojë loja me kohën, siç ka ndodhur këto vite, atëherë pritet që të hapet “Kutia e Pandorës”.
Pikërisht në këtë situatë, Moska zyrtare ka nisur sërish presionin ndaj Beogradit që të pajisë me status diplomati të gjithë stafin e “Qendrës Humanitare të Nishit”, e cila sipas Perëndimit nuk është gjë tjetër veçse komandë e zbulimit rus.
Moska ka dërguar në Nish një komandant të ri, i cili nuk vjen nga jeta ushtarake por është civil.
Sipas portalit Sputnik, bëhet fjalë për Viktor Guljeviç, një inxhinier civil që ka shërbyer në qendrën e Liqenit Bajkal.
Por NATO ka bërë të ditur se bëhet fjalë vetëm për një manovër dhe i ka kërkuar zyrtarisht Beogradit të mbyllë qendrën e Nishit.
Edhe njeriu i Moskës në qeverinë serbe, shefi i diplomacisë, Ivica Daçiç, ka theksuar se pritet që të mbyllet qendra, kur deklaroi për Sputnik se ka një vullnet për të mos e dhënë statusin diplomatik për punonjësit e lartë.
Por Perëndimi, po e shfrytëzon atmosferën pas Katalonjës për të ndaluar Beogradin të bëjë lojën e vjetër; herë me njërën herë me tjetrën.
Në një diskutim për Radio Europa e Lirë në gjuhën serbe, ish-diplomati austriak, Florian Bieber, një ekspert për Balkanin që punon në qendrën e Bugajskit, thotë se Spanja nuk është Jugosllavi por në këto territore ka çështje të hapura. Ai përmendi Istrian mes Sllovenisë dhe Kroacisë, ndërkohë që e bëri të qartë që nëse skifteri i Moskës, presidenti i Republika Srbska-s, Milorad Dodik do të bëjë tentative për shkëputje, siç bëri vjet me referendumin në territorin e tij, atëherë loja do të hapet edhe më tej.
“Krijimi i kushteve për pavarësi është specifik por varet nga grupet indipendentiste”, tha Bieber për Evropa e Lirë në gjuhën serbe.
Sipas tij, i vetmi ndryshim mes Katalonjës dhe Kosovës është dhuna që u shoqërua në rastin e dytë.
“Spanja është një shtet demokratik, ndërsa Yugosllavia e Millosheviçit nuk ishte e tillë.
Millosheviç injektoi një politikë të egër nacionaliste që ushqeu përplasjen dhe solli ndarjen e Jugosllavisë në të gjithë pjesët e saj.
Kjo situatë mund të përsëritet edhe në Vojvodinë apo Istria, por gjithçka varet nga Republika Srbska.
Milorad Dodik por e përdor referendumin si një shenjë hipokrizie të Perëndimit, por Republika Srbska ashtu si Katalonja nuk është përballur me dhunë policore apo me repression”, tha Bieber.
Ai shton se sjellja e aktorëve në lojë do të varet pikërisht tek rruga që ata paraqesin për kërkesat e tyre; nëse do të ketë proces demokratik gjithçka do të shkojë në rrugë normale.
“Në Republika Srpska, një referendum ka një rrisk të lartë dhe mund të përfshijë të gjithë rajonin, siç ndodhi 25 vjet më parë, ku Ballkani u përfshi në spastrim etnik, duke përdorur historinë si legjitimitet.
Edhe Skocia shpesh përsërit të drejtën e vet për vetëvendosje por e bën këtë Brenda një procesi. Çdo veprim i dhunshëm do të djellë efektin domino”, shtoi Bieber.
Pas “PO”-së së Katalonjës, një grup hungarezësh të Vojvodinës dolën në një manifestim për të proklamuar “Republikën e Vojvodinës”.
Por ende nuk është e qartë se ç’përfaqësojnë këto grupe. Megjithatë duket se në Ballkan po hapet sërish çështja e kufijve…
Ndërkaq, zyrtari më i ri i DASH-it që zëvendësoi Victoria Nuland, deklaroi se do të shkojë në Moskë për të bërë presion që Rusia të lërë trazirat në Ballkan.
“Do t’i kërkoj Moskës t’i japë fund aktiviteteve destabilizuese në Ballkan.
SHBA do të mbështesë të gjitha aleatët në luftën kundër korrupsionit si dhe do të mbështesë të gjitha format për të reduktuar influencën malinje të Rusisë e cila ka synim të dobësojë shoqëritë. Është në interesin e qytetarëve amerikanë dhe rusë që të ulen tensionet mes dy shteteve më të mëdha, që janë fuqi bërthamore. Në të njëjtën kohë, qeveria ruse duhet të kuptojë se raportet mes dy fuqive nuk mund të jenë të mundura, nëse Moska vijon të godasë fqinjët dhe nëse përpiqet të minojë besimin e institucioneve amerikane dhe aleatëve të saj”, tha Ndihmës Sekretari Amerikan i Shtetit Wes Mitchell. /tesheshi.com/
