Dje u raportua se familja e Adem Jasharit nuk do të hapë dyert për mysafirë. Por sot dera e Kullës së Jasharëve u hap.
Të parët që u pritën aty ishin krerët e Forcës së Sigurisë së Kosovës dhe ministri Haki Demolli. Ky i fundit, së bashku me komandantin e FSK-së, Rrahman Rama pasi bënë homazhe te varrezat shkuan në odën e famëmadhe ku u pritën nga Murat Jashari, nipi i komandantit legjendar Adem Jashari.
Por një gjë të tillë nuk e kanë bërë kryeministri Mustafa dhe kruekuvendari Veseli të cilët janë mjaftuar vetëm me homazhe te varrezat .
Nga ana tjetër, për dallim nga krerët e shtetit, drejtuesit e Lëvizjes Vetëvendosje pas homazheve të bëra në Prekaz kanë vizituar edhe Familjen Jashari ku janë pritur nga Murati.
Kryetari i VV-së, Visar Ymeri pasi që bëri homazhe tha se kjo ditë është e veçantë për ta nderuar familjen Jashari, ngase sipas tij, në këtë familje ka ndodhur një prej ngjarjeve më të rëndësishme dhe një sakrificë e cila është e papërsëritshme në historinë e kombit shqiptar.
“Ushtria Çlirimtare e Kosovës është një prej ngjarjeve më të rëndësishme që e ka pasur kombi shqiptar, e cila përmes organizmit popullor e ka dëshmuar se sa i madh është vullneti për liri dhe se sa e rëndësishme është angazhimi për të mirën e përgjithshme. Ndërkohë, që brenda kësaj ushtrie çlirimtare, natyrisht se familja Jashari një prej ngjarjeve më të rëndësishme dhe është një sakrificë e cila është e papërsëritshme në historinë tonë. Në këtë drejtim mendojë që rezistenca, beteja dhe sakrifica e familjes Jashari është një gjë të cilën ne kurrë nuk duhet ta harrojmë”, tha Ymeri duke shtuar se sakrifica e tyre e solli këtë liri që sot populli e gëzon.
Ai tha se Kosova që po ndërtohet sot nuk është në përputhje me idealin e Ushtrisë Çlirimtare të Kosovës.
“Këta politikanët tanë institucionalë e shndërruan Kosovën në një plaçkë të cilën vazhdimisht e keqpërdorën për interesa të veta”, shtoi Ymeri. /tesheshi.com/
