Julia Kristeva, filozofja dhe intelektualja e famshme bullgare që jeton në Francë prej 60 vitesh, një lloj “Kadareje” bullgare, është konsideruar bashkëpunëtore e Dajarna Sigurnost- spiunazhit famëkeq të Bullgarisë.
Në vendin ish-komunist të BE-së hapja e dosjeve ndodhet në një hap me Shqipërinë dhe tani kanë filluar të dalin në sipërfaqe të fshehtat e sistemit.
Një nga këto është dosja e Kristevës, që u bë publike për AFP-në nga Ekaterina Bontcheva, anëtare e Komisionit Shtetëror të Dosjeve.
Julia Kristeva ka reaguar e indinjuar duke kundërshtuar dhe mohuar çdo akuzë. Ajo akuzon autoritetet bullgare se kanë manipuluar dosjen e saj.
Sipas komisionit, Julia Kristeva që jeton në Francë prej vitit 1966 është rekrutuar në vitin 1971 kur ishte 30 vjeç.
Madje sipas komisionit ka marrë edhe vulën e kodit, si dhe pseudonimin përkatës. Nofka e Kristevës ka qenë Sabina.
“Është dikush që do të bëjë keq. Është akuzë jo vetëm false e groteske por një shpifje e ulët. Kam qenë e kontrolluar dhe e përgjuar çdo moment nga spiunët”, thotë filozofja e njohur.
Për ta bërë më të thjeshtë rrymën e filozofisë së profesoreshës së njohur, mjafton të sjellim një shembull nga Shqipëria.
Disa djem të rinj, pedagogë të Universitetit Europian të Tiranës, të ftuar tek show i Arjan Çanit shpallën rrymën e “kontestualistëve”.
Julia Kristeva është themeluese e kësaj rryme së bashku me Michel Foucault, Jacques Derrida e Jacques Lacan.
Ajo aktualisht është profesoreshë e State University of New York si dhe Universitetit të Parisit.
Ka marrë shumë çmime, ndër të tjerat çmimin që i dedikohet babait të revolucionit të kadifenjtë në Çekosllovaki, Vaslav Havelit. /tesheshi.com/
