Nuk kanë munguar mufkat gazetareske në rastin e ngjarjes së rëndë të ndodhur një ditë më parë në Tiranë, ku Hamza Muskurti vrau të vëllanë e kunatën, krejt gjakftohtë, për shkak të një mosmarrëveshjeje pronësie mbi një biznes që dikur e kishin bashkë.
Ekzekutimi i llojit “brenda familjes” ndodhi në dyqanin që ata dikur bënin tregëti krahpërkrah, te rrugica “Islam Alla”, e cila lidh Rrugën e Kavajës me “Myslym Shyrin”.
Por fakti se Hamza Muskurti, autori i ngjarjes së rëndë, shfaqej dhe me profilin e një besimtari musliman, gjithsesi në mënyrën më antipatike të mundshme, referuar sidomos gjuhës në rrjete, thënë ndryshe aspak islame, ka bërë që të abuzohet në raportim gazetaresk si në rastin e më poshtëm.
I duhet kujtuar mediave për rastin se sfondi fetar nuk ekziston fare, në terma asbolutë, në rastin e kësaj përplasjeje vëllazërore që përfundoi në tragjedi. Kjo pasi si vrasësi e si viktima thuajse nuk bënin aspak jetë fetare, paçka se biznesi për të cilën ata në sherr kishte lëndë fetare. Pos kësaj, do mjaftonte fakti që vrasësi Hamza Muskurti nxirrte në publik çështje të nxehta familjare, me statuse në FB, edhe kjo kundër parimeve islame, tregon për një karakter të mbrapshtë që jo vetëm për këtë arsye, ishte bërë shqetësues dhe në bashkësinë e besimtarëve aty afër.
Pra, qasja ndaj Hamza Muskurtit duhet të jetë ajo një njeriu problematik, pa lidhje me profilin aspak dinjitoz të një besimtari.
Një njeri që s’linte njeri ndër ata me status VIP për të dalë në foto, nuk kishte asnjë shok musliman. /tesheshi.com/
