Një vend në kujtime mund ta zërë shumëkush, por për të hyrë në histori duhet diçka më shumë. Kjo ka ndodhur për mesfushorin sllovak të Napolit, Marek Hamsik, i cili me golin e shënuar ndaj Torinos në fitoren 1-3 të Napolit, arriti as më shumë e as më pak, por vetë ikonën e napoletanëve, Diego Maradonën. Edhe pse jo në rolin e sulmuesit, Hamsik ka arritur shifrën e 115 golave me të njëjtën fanellë, atë të Napolit, po aq sa shënoi edhe ylli argjentinas me të njëjtën ngjyrë në bluzë, këtu e tre dekada më parë.
Që nga gushti i vitit 2007 kur një djalosh i talentuar me një kreshtë mbi kokë hyri në fushë, sllovaku nuk e ndërroi më me asnjë tjetër të kaltrën e bluzës së Napolit. E që prej asaj kohe, në të mirë e në të keq, në kategori të dytë e në të parë, me sulmues klasi si Cavani apo Higuain, ai nuk u ndal së shënuari derisa arriti shifrën 115 të Maradonës, të cilën natyrisht që do ta kalojë.
Me mbërritjen e trajnerit Sarri, Hamsik rigjeti shkëlqimin e zbehur disi, pasi sllovaku është fiks lojtari që pëlqen pasimin e shkurtër e të shpejtë, si edhe gjuajtjen me të dy këmbët nga çdo pozicion.
Nëse do të arrinte edhe të fitonte Seria A, siç bëri Maradona dekada më parë, atëherë kurorëzimi si “trashëgues i fronit” do të ishte i natyrshëm.
Por megjithatë, tashmë në Napoli do të flitet edhe për “epokën Hamsik”. /tesheshi.com/
