Luis Hamilton është gati të lërë Formula 1 për të shkuar në Hënë. Pak a shumë këtë ka dashur të thotë vetë britaniku, kur ka vizituar Qendrën Hapësinore të NASA-s, në Teksas të Amerikës.
I surprizuar për atë që ka parë dhe mënyrën se si punohej për të mësuar “të fshehtat” e hapësirës, Hamilton ka bërë shaka me njerëzit që e shoqëronin se është gati ta lërë sportin që e ka bërë dhe po e bën kampion bote, për t’iu përkushtuar “pilotimit të makinave fluturuese”.
Pasi ka marrë informacione të përgjithshme, Hamilton ka nxituar të bëjë disa foto, qoftë me “kaskën” e astronautit, qoftë pranë “anijeve kozmike”, foto të cilat i ka publikuar në profilet e tij në mediat sociale, duke u vënë diçitura provokuese, e duke bërë shaka me ndoshta pasionin e ri që krijoi.
Piloti ishte i pranishëm në Qendrën Hapësinore të NASA-s në Teksas, pasi në fundjavë do të garojë në pistën e Ostinit, po në Teksas. Në një moment kur e ka thuajse të sigurtë titullin kampion, pasi është i shkëputur me 59 pikë nga rivali Vetel, e kur ndoshta fitimi i titujve rradhazi, mund të jetë kthyer në “sport të mërzitshëm”, britaniku mund “ta gjejë veten” duke fluturuar në ajër, për të përftuar eksperiencën e Hënës, apo planeteve të tjerë. /tesheshi.com/
