Luis Hamilton me makinën Mercedez, është kampioni i ri i Botës në Formula 1.
Britaniku e fiton titullin dy gara para përfundimit të sezonit, pas garës së Meksikës që u zhvillua të dielën në mbrëmje.
Në këtë garë, Hamilton u rendit në vendin e 9-të, por rivali i tij Sebastian Vetel i Ferrarit, u rendit vetëm i katërti.
Gara e Meksikës u kompromentua që në nisje për Hamilton dhe Vetel, makinat e të cilëve u prekën me njëra-tjetrën, duke bërë që britanikut t’i çahej goma, ndërsa gjermanit t’i prishej pjesa e përparme.
Pas hyrjes në bokse, Vetel rikuperoi 14 vende e në fund u rendit i katërti. Ndërsa Hamilton parakaloi disa pilotë, si edhe përfitoi nga tërheqja nga gara e disa të tjerëve. Gara u fitua nga holandezi Maks Verstapen i Red Bull, në vendin e dytë u rendit finlandezi Valeri Botas i Mercedez dhe i treti finlandezi tjetër Kimi Raikonen i Ferrarit.
Pas garës së Meksikës, Hamilton ka 56 pikë më shumë se Vetel, kur kanë mbetur edhe dy gara, çka nënkupton se matematikisht ai është kampioni i ri i Botës. Për Hamilton, ky është titulli i katërt në Formula 1, gjë që e bën britanikun pjesë të legjendave.
Ai barazoi me 4 tituj, legjendën Alen Prost që ka garuar në vitet ’80, si edhe rivalin e tij aktual Sebastian Vetel, që ka gjithashtu 4 tituj kampion bote. /tesheshi.com/
