Max Verstappen bëhet fituesi më i ri i një gare në Formula 1, e njëkohësisht i pari pilot holandez që fiton një garë në këtë kategori.
Vetëm 18 vjeç, me vetëm pak ditë në timonin e makinës së tij të re, një Red Bull, Verstappen ka dhënë shenjat e para të një kampioni të ardhshëm. Me fitoren e sotme, Verstappen u ka dhënë të drejtë drejtuesve të skuadrës, që zgjodhën ta ndërrojnë atë me Daniil Kvyat-in. I pari la Toro Rosso-n dhe mori për të pilotuar një Red Bull, i dyti u detyrua të ndjekë rrugën e kundërt, me një ulje të befasishme në karrierë pas një serie gabimesh të pafalshme në garim.
Por gara në pistën e Barcelonës do të kishte një nisje shkatërrimtare për dy pilotët e Mercedes-
it. Britaniku Hamilton nuk e duron dot më faktin që është lënë në hije nga Rosberg, duke u bërë i paparashikueshëm. Dhe në xhiron e parë të garës, del jashtë piste, humb kontrollin, e godet dhe makinën e Rosberg-ut. Jashtë që të dy! Garë e mbaruar për dy pilotët me makinat më të mira.
Gjithçka më pas do të ishte rivalitet mes makinave Red Bull e Ferrari, me fitues në fund të garës Verstappen-in.
“Kjo është dita e Max-it. Si një sportist, ne duhet ta respektojmë atë!” Kështu deklaron Vettel pas garës.
Vendi i dytë dhe i tretë u takoi pilotëve të Ferrari-t, Raikkonen-it dhe Vettel-it. I pafat Ricciardo, të cilit i shpërthen goma në fund të garës. Por arrin ta ndërrojë, e të kthehet e të marrë vendin e katërt.
Nico Rosberg e kryeson sërish kampionatin, me 100 pikë, por në vend të dytë nuk është më Hamilton, që ka zbritur në të tretin. Raikonnen ka 61 pikë, e vjen menjëherë pas Rosberg-ut. Vettel e Ricciardo mbajnë vendin e katërt e të pestë në renditjen e përgjithshme të pilotëve me pikë të njëjta, nga 48. /tesheshi.com/
