Është ai sërish në pole position, është ai sërish i pari në garën e nesërme të Shangait në Formula 1. Lewis Hamilton ka treguar edhe njëherë se është i pakapshëm në provat zyrtare.
Dy javë pas vendit të parë në provat zyrtare në Melburn, vjen ky vend i parë në Shangai. Në 11 garat e fundit të Çmimit të Madh të Kinës, britaniku ka siguruar gjashtë herë vendin e parë në provat zyrtare. 63 pole position për të në karrierë, që e afrojnë me rekordet e Ayrton Senna-s dhe Michael Schumacher-it.
E njëjta tablo në provat e sotme zyrtare; një konfirmim i betejës së saponisur mes Mercedes-it dhe Ferrari-t.
Këtë e dëshmon renditja në këto prova në katër vendet e para, e njëjtë me atë të para dy javëve: Hamilton, Vettel, Bottas dhe Raikkonen.
Gara, pastaj, është tjetër gjë; parashikohen fërkime që në kthesën e parë. Do fitojë Vettel sërish? Askush nuk e thotë dot. Por e sigurt është se kokëkuqja do të jetë sërish aty, për të kërkuar një tjetër fitore pas asaj në Australi.
Çmimi i Madh i Kinës nis të dielën në 08:00 me orën tonë. Një garë fantastike na pret! /tesheshi.com/
