Makina me numrin 44 ka kaluar e para në finishin e garës së Monakos, duke i dhënë fitoren e 44-t në Formula 1 pilotit që gjendej brenda saj.
Lewis Hamilton është kthyer në luftën për titull me një fitore epike në Monako. Mercedes-i i tij dhe strategjia e ndërrimit të gomave e kanë nxjerrë faqebardhë pilotin britanik.
Gara e sotme, e gjashta e këtij sezoni, ka nisur pas makinës së sigurisë, për shkak të shiut që nuk kishte të pushuar. Me një start jo të zakonshëm, që i hoqi pikërisht momentet më emocionuese garës, Ricciardo do të udhëhiqte i qetë.
Rosberg-u i vendit të dytë do të ndjehej në vështirësi, në të parën garë ku nuk bënte protagonistin. Duke i hapur rrugën Hamilton-it në xhiron e 16-të.
Me pushimin e shiut dhe tharjen e pistës, nisi dhe lufta e strategjive. Hamilton-i doli i fituar, pasi u tregua i duruar dhe priti tharjen e plotë të asfaltit, kurse Ricciardo u tradhtua nga mekanikët e Red Bull-it, që u gjendën të papërgatitur dhe ia vonuan kthimin në pistë.
Australiani, pas britanikut, do të tentonte disa herë ta parakalonte atë. Ngushtësia e rrugës dhe mbrojtja jo shumë korrekte e Hamilton-it ia pamundësuan Ricciardo-s daljen në vend të parë.
Me fitoren e sotme, Hamilton-i e ngushtoi me 19 pikë diferencën me Rosberg-un kryesues në kampionat, teksa gjermani e përfundoi garën i shtati.
Vendi i tretë i takoi Sergio Perez-it të Force India-s. Raikkonen u tërhoq shpejt nga gara, kurse piloti tjetër i Ferrari-t, Vettel, e kaloi finishin menjëherë pas treshes së parë.
Vendi i pestë i Alonso-s është rezultati më i mirë sezonal i McLaren-it, që pa bujë po nis të rikthehet mes makinave më të mira.
E tërë dhjetëshja e parë në finishin e sotëm ishte kjo: Hamilton, Ricciardo, Perez, Vettel, Alonso, Hulkenberg, Rosberg, Sainz, Button dhe Massa.
Renditjen e kryeson sërish Rosberg, me 106 pikë, i ndjekur nga Hamilton, që ka tashmë 82 pikë. /tesheshi.com/
