Lewis Hamilton është futur tashmë plotësisht në garën për titull në këtë sezon të Formula 1-shit. Pas Montekarlos, ka ardhur fitorja e dytë në radhë. Britaniku e ka fituar për herë të pestë garën e Kanadasë, duke i afruar mjaft rivalit të tij kryesor, mbajtësit të vendit të parë, Nico Rosberg-ut.
Gara e mbrëmshme do të fillonte me një nisje të shkëlqyer të ferraristit Vettel, që me një manovër fenomenale del nga vendi i tretë në të parin. Për t’u pasuar nga një prekje tjetër mes Hamilton-it dhe Rosberg-ut, me britanikun që e nxjerr në bar gjermanin, gara e të cilit do të komprometohej prej atij çasti e tutje.
Mercedes-i e nxori fitues pilotin e saj me një strategji të mirëmenduar, me një ndalesë për ndërrimin e gomave, përkundër dy ndalesave të pilotëve të Ferrari-t. Strategjia e zgjedhur qe vendimtare në kalimin e finishit i pari prej Hamilton-it.
Rosberg do të rrezikonte në fund të dilte dhe jashtë gare, ndërsa humbi për pak momente kontrollin e makinës gjatë një përpjekjeje për të parakaluar të riun Verstappen.
Ricciardo do të kishte gjithashtu një garë jo fort të mirë, të zhvilluar mes peripecive, duke e detyruar australianin e Red Bull-it të kënaqej me një vend të shtatë.
Gara do të kishte fitues Hamilton-in, me Vettel-in menjëherë pas tij. Për Williams-in ka ardhur podiumi i parë. Bottas është renditur i treti mes pilotëve, kurse Massa është detyruar të tërhiqet.
Dhjetëshen fituese e plotësuan nga vendi i katërt këta pilotë: Verstappen, Rosberg, Raikkonen, Ricciardo, Hulkenberg, Sainz dhe Perez.
Nëntë pikë i ndajnë dy mbajtësit e vendeve të para në renditjen e përgjithshme: Rosberg ka 116 pikë, e Hamilton e ndjek atë me 107 pikë.
Gara e ardhshme vjen shpejt, vetëm pas gjashtë ditësh. Këtë të dielë ajo do të zhvillohet në Baku të Azerbajxhanit, në një pistë debutuese. /tesheshi.com/
