Dy pilotët e Mercedes-it, britaniku Lewis Hamilton dhe gjermani Nico Rosberg, mezi e presin nisjen e sezonit të ri në Formula 1.
Hamilton është shpallur kampion në dy kampionatet e shkuara, me Rosberg-un në të dy herët prapa tij, çka i bën garat e këtij viti, që nisin pas një jave, të paralajmërojnë shumë më tepër rivalitet.
Kampioni i botës ndjehet i motivuar para nisjes së sezonit. “Tani është koha për të parë se gjer ku mund të shkoj, në të panjohurën. Nuk e di sa larg mund të shkoj, sa gjatë do të qëndroj në Formula 1.”
“Po futem në një kapitull të ri në jetën time, e do të shoh ku do të më çojë,” ka thënë piloti 31-vjeçar. Ai e përshkruan veten të motivuar nga dashuria për sportin dhe makinat.
Në anën tjetër, Rosberg shpreson ta mundtë shokun e skuadrës, edhe pse e pranon se do të jetë e vështirë. “Parë në mënyrë realiste, do të jetë një sfidë e vështirë, sepse ai ka qenë më mirë dy vitet e fundit. Ai është favorit, por do të jetë një betejë e madhe, e kjo është ajo së cilës i gëzohem.
Në lidhje me skuadrat e tjera kundërshtare, Rosberg e drejton gishtin tek kokëkuqja italiane, “Ferrari ngjan për momentin si kërcënimi më i madh, dhe është një kërcënim i madh, sepse janë shumë pranë.”
Sezoni i ri i Formula 1-shit nis më 20 mars me garën e Australisë. /tesheshi.com/
