Nico Rosberg i ka ngrirë buzëqeshjen rivalit të tij, duke fituar Çmimin e Madh të Italisë e duke e çuar diferencën me kryesuesin e kampionatit në vetëm dy pikë.
Por më shumë se meritë e Rosberg-ut, ka qenë një nisje tejet e dobët e Hamilton-it ajo që e ka ndryshuar tërë fatin e garës. I jashtëzakonshëm dje në prova, Hamilton ka gabuar pabesueshmërisht sot në start, duke zbritur nga vendi i parë në të gjashtin në pak metra.
Starti ka qenë dhe pika kulmore e garës, që më pas ka patur një rrjedhë pa shumë të papritura. Rosberg ka mbajtur kryesimin pa e vënë për asnjë çast në dyshim atë, ndërkohë që Hamilton-it i është dashur të kryejë një sërë parakalimesh për të minimizuar dëmin e startit.
Strategjia me një ndalesë për ndërrimin e gomave ka patur gjithashtu efektin e saj në renditjen e dy pilotëve të Mercedes-it në dy vendet e para, pasi të gjitha skuadrat e tjera kishin një strategji me dy ndalesa.
Ferrari u duk në formë të mirë në Monza, edhe pse jo aq sa për ta lënë pas Mecedes-in. Ama, më së paku, kokëkuqja ka qenë në gjendje të renditej para Red Bull-ëve, që në garat e shkuara i kishin sfiduar paq.
Rosberg do ta kalonte finishin i pari, 15 sekonda para Hamilton-it, duke fituar garën e dytë në dy javë. Tani Hamilton ka 250 pikë, dy më shumë se Rosberg, që ka arritur në kuotën e 248 pikëve. Kur kanë mbetur dhe shtatë gara gjer në fund të kampionatit, lufta për titull është më e ndezur se kurrë.
Vettel u ngjit në podium si piloti që e mbylli garën në vend të tretë. Pas tij do të vinin Raikkonen, Ricciardo, Bottas, Verstappen, Perez, Massa dhe Hulkenberg, për të plotësuar dhjetëshen e parë që merr pikë.
Gara e ardhshme është pas dy javësh, tanimë jo më në Europë, por në Singapor. /tesheshi.com/
